«Истиқлол» ё «Дурдой»?

24 cентябр (АМИТ «Ховар», Аловиддин Бӯриев) – Имрӯз дар варзишгоҳи марказии шаҳри Душанбе ду дидор миёни дастаҳои «Истиқлол»-и Тоҷикистон бо «Дурдой»-и Қирғизистон соати 16 ва «Тайван Пауэр Компани»-и Тайван бо «Ал-Аммари»-и Фаластин соати 19 барои Ҷоми президенти Конфедератсияи футболи Осиё баргузор мегардад. Дар нишасти матбуотие, ки дирӯз дар меҳмонхонаи «Hyatt Regency» бо сармураббиён ва капитани дастаҳо баргузор шуд, зикр гардид, ки ҳамаи дастаҳо барои нишон додани маҳорати бозингарии худ ва ба даст овардани Ҷом ба Тоҷикистон омадаанд. Бояд гуфт, ки бозии байни дастаҳои «Истиқлол» ва «Дурдой» бозии асосӣ ва тақдирсоз дар гурӯҳи «А» маҳсуб мешавад. Дастаи «Тайван Пауэр Компани» охирин ғолиби ин Ҷом дар бозии гузашта аст.