Коргоҳ барои 100 нафар дӯзанда

Бадахшон, 3 сентябр. (АМИТ «Ховар», Л. Додо).-Рӯзҳои наздик бинои кӯҳнаи мактаби рақами 7-уми шаҳри Хоруғ ба корхонаи дӯзандагӣ табдил хоҳад ёфт. Алъон бинокорон ба таъмиру барқарорсозии бино машғуланд. Баъди мавриди баҳрабардорӣ қарор додани корхона наздики 100 нафар занону духтарони маҳаллӣ соҳиби ҷойи кор мегарданд.Тавре ки аз мақомоти маҳаллии ҳокимияти давлатии вилоят хабар доданд, иқдоми мазкур аз ҷониби сардори Агентии амволи махсуси назди ҳукумати кишвар Лолахон Раҳмонов роҳандозӣ шуд.Дар як муддати кӯтоҳ масолеҳи сохтмонӣ аз шаҳри Душанбе ба маркази вилоят интиқол дода шуд ва коргарони ширкати сохтмонии «Порвор» ба навсозии бино машғул шуда, ният доранд, ки то рӯзи 9-уми сентябр биноро бо сифати баланд таъмир намоянд.