Маркази густариши истеъдоди ҷавонон

Душанбе, 28 сентябр. (АМИТ «Ховар», Людмила Дубинина). — Беш аз 1040 нафар хонандагони мактаб ва гимназияю литсейҳои пойтахт дар Маркази густариши истеъдоди шаҳри Душанбе ба таҳсил шурӯъ карданд. Дар ин марказ қариб 11 барномаи иловагии таълимӣ аз рӯи фанҳои риёзӣ, физика, кимиё, биология, иттилоот, забони русӣ ва ғайра дар амал татбиқ мешавад. Дар марказ клубҳои «Забондӯст», «Хабарнигорони ҷавон», «Фарҳанги забони англисӣ» ва «Ҳуқуқшиносон» фаъолият дошта, дар онҳо маҳфилҳои эҷодӣ, конфронсҳо, мизҳои мудаввар ва ҳамоишу мулоқотҳо доир мегарданд. Мувофиқи суханони директори марказ Рустам Сафаров, ҳар сол аз рӯи ҳамаи фанҳои асосӣ олимпиадаҳои шаҳрию ҷумҳуриявӣ роҳандозӣ мешаванд.