Мол ва хидматрасонии беҳтарин муайян мешавад

Душанбе, 7 сентябр. (АМИТ «Ховар», Бекназари Абубакр).-Тавре ки аз «Тоҷикстандарт» ба АМИТ «Ховар» хабар доданд, 15 сентябр дар шаҳри Душанбе маросими мукофотонидани ғолибони озмуни «Мол ва хидматрасонии беҳтарини Ҷумҳурии Тоҷикистон» баргузор мегардад. Агентии «Тоҷикстандарт» маротибаи сеюм аст, ки бо иштироки як қатор вазорату идораҳои кишвар чунин озмунро роҳандозӣ мекунад. Озмуни имсола, ки 147 корхона, ташкилот ва соҳибкорони инфиродии кишвар барои иштирок дар он дархост дода буданд, моҳи июни соли равон оғоз ёфта буд. Аз рӯи натиҷаи марҳилаи аввали озмун, ки 1 август дар вилоятҳо ва ноҳияҳои тобеи ҷумҳурӣ анҷом ёфт, 95 нафар иштирокунандагон барои ширкат дар марҳилаи ниҳоии он роҳхат пайдо карданд. Алҳол комиссияи ҷумҳуриявии озмун дар маҳалҳо вазъи даври дуюмро арзёбӣ намуда, баъди анҷоми он ба ҳаками озмун барои муайян кардани ғолибони он тавсияҳо дода мешаванд.