Мулоқоти А. Достиев бо тоҷикони вилояти Иваново

Душанбе, 12 сентябр. (АМИТ «Ховар», Мавҷуда Анварӣ). — 7-8 сентябри соли равон Сафири Ҷумҳурии Тоҷикистон дар Федератсияи Русия Абдулмаҷид Достиев, бо даъвати губернатори вилояти Иваново ҷиҳати ширкат дар VII-умин Ҳамойиши байналмилалии саноати бофандагӣ таҳти унвони «Золотое кольцо» ба шаҳри Плёси вилояти Иваново сафар дошт. Дар ҳошияи ҳамойиш А. Достиев бо губернатори вилояти Иваново Михаил Александрович Мен мулоқот намуд. Ҷонибҳо дар бораи сатҳи хуби муносибатҳои дуҷонибаи Тоҷикистону Русия, кору зиндагии тоҷикистониёни муқими вилояти Иваново, аз ҷумла донишҷӯёни тоҷик, роҳҳои рушду нумӯи робитаҳо табодули назар карданд.8 сентябр дар бинои «Хонаи миллатҳо»-и шаҳри Иваново А. Достиев бо намояндагони ниҳодҳои гуногуни ҳукумати вилояти Иваново, роҳбарони Созмони ҷамъиятии тоҷикон, Маркази фарҳанги миллии Осиёи Марказӣ «Осиё» ва Созмони ҷамъиятии озариҳои вилоят, роҳбарияту устодони чанде аз мактабҳои олии Иваново вохӯрӣ намуд. Зимнан таъкид гардид, ки дар қаламрави вилоят беш аз 2 ҳазор тоҷикистонӣ кору зиндагӣ дошта, Созмони ҷамъиятии тоҷикон бо роҳбарии Илҳомҷон Бобоев бомуваффақият фаъолият дорад. Ҳамчунин худи ҳамон рӯз дидори Сафири кишвар бо намояндагони донишҷӯёни тоҷикистонии мактабҳои олии вилояти Иваново доир гардид.Дар вилояти Иваново бештар аз 400 нафар донишҷӯи тоҷик дар даргоҳҳои гуногуни илмӣ ба таҳсил фаро гирифта шудаанд ва барояшон шароити хуби омӯзишу будубош фароҳам гардидааст. Дар ин бора аз Сафорати Ҷумҳурии Тоҷикистон дар Федератсияи Русия ба АМИТ «Ховар» иттилоъ доданд.