Мулоқоти А. Холиқов бо роҳбаладони Ҳаҷ-2012

Душанбе, 24 сентябр. (АМИТ «Ховар», Дилшодаи Хайруллоҳ)- 22-уми сентябри соли ҷорӣ дар Кумитаи корҳои дини назди Ҳукумати Ҷумҳурии Тоҷикистон мулоқоти раиси кумита Абдураҳим Холиқов бо роҳбаладони мавсими Ҳаҷ-2012 баргузор гардид. Дар рафти мулоқот масъалаҳои марбут ба омода намудани зоирини тоҷик ба Ҳаҷ, риояи фарҳанги исломӣ дар хонаи Худо, дар сатҳи баланд хидмат расонидан ба зоирин ва дигар масоили вобаста ба фаъолияти роҳбаладон мавриди баррасӣ қарор гирифт. Раиси кумита аз роҳбаладон даъват ба амал овард, ки барои хидмат расонидан ба зоирин тамоми ҷаҳду кӯшиши худро дареғ надоранд. Тибқи барномаи Кумитаи корҳои дин ҳар як роҳбалад бояд тӯли беш аз як моҳ бо гуруҳи зоирине, ки онро роҳбаладӣ мекунад, дарсҳои омодабошӣ гузаронад. Дар сурати анҷом надодани уҳдадориҳои худ роҳбалад метавонад аз рӯйхати роҳбаладон соқит гардад. Бояд зикр намуд, ки имсол беш аз 10 нафар роҳбаладони соли гузашта бе супоридани ҳеҷ гуна имтиҳон ба рӯйхати роҳбаладон ворид гардиданд.