Мулоқоти С.Девонаев бо коршиносони БҶ

Душанбе, 19 сентябр. (АМИТ «Ховар», Ибодат Давлатова).- Дар шаҳри Душанбе мулоқоти сардори Хадамоти муҳоҷирати назди Ҳукумати ҶТ Сафиалло Девонаев бо намояндагони Бонки ҷаҳонӣ бо роҳбарии Сударшан Канагароҷ баргузор гардид. Тавре ки аз Хадамоти муҳоҷирати назди Ҳукумати ҶТ ба АМИТ «Ховар» иттилоъ доданд, Сафиалло Девонаев ба меҳмонон аз вазъи масъалаи муҳоҷирати меҳнатӣ дар кишвар ва нақшаҳои кори Хадамоти муҳоҷират ҷиҳати ҳалли проблемаҳои мавҷуда нақл кард. Роҳбари барномаи Бонки ҷаҳонӣ оид ба муҳоҷират дар минтақаи Аврупо ва Осиёи Марказӣ Сударшан Канагароҷ дар навбати худ зикр намуд, ки Хадамоти муҳоҷирати Тоҷикистон бояд роҳҳои ҳалли проблемаҳои соҳаи муҳоҷирати меҳнатиро пайдо намояд. Ӯ дар баробари ин иброз дошт, ки Тоҷикистон дар ин бахш ба муваффақиятҳои назаррас ноил шудааст.