Намоиши филмҳои 20 кишвар дар Тоҷикистон

Душанбе, 24 сентябр. (АМИТ «Ховар», Дилшодаи Хайруллоҳ)- Аз 16 то 20 октябр дар Душанбе бо сарпарастии Кумитаи телевизион ва радиои назди Ҳукумати Ҷумҳурии Тоҷикистон дар толорҳои Иттифоқи синомагарон ва Кинотеатри Зебуннисо Панҷумин кинофестивали байналмилалии «Дидор» бо намоиши филмҳо ва ширкати синамогарони Тоҷикистон, Афғонистон, Озарбойҷон, Арманистон, Инглистон, Гурҷистон, Эрон, Амрико, Мали, Маҷористон, Муғулистон, Қазоқистон, Қирғизистон, Кореяи Ҷанубӣ, Русия, Фаронса, Ӯзбекистон, Туркманистон, Ҷопон ва Швейтсария баргузор мешавад. Барномаи кинофестивал аз беҳтарин филмҳои аниматсионӣ, мустанад ва ҳунарии кишварҳои ширкаткунанда, ки дар 2 соли охир наворбардорӣ шудаанд, иборат аст. Ҳамзамон беҳтарин филмҳои ҳунарии ин барнома барои сокинони шаҳри Қурғонтеппа дар толори Театри вилоятии драмавӣ- мусиқии ба номи Ато Муҳаммадҷонов ба намоиш гузошта хоҳанд шуд.Тамошои филмҳо ройгон буда, ҳамарӯза соати 10 шӯруъ мешаванд ва то соати 21 давом мекунанд.