Намояндагии Хадамоти фармасевтӣ дар Шуғнон

Хоруғ, 18 сентябр. (АМИТ «Ховар», Л. Додо).-Дар шаҳри Ваҳдати ноҳияи Шуғнон бинои намояндагии Хадамоти фаъолияти фармасевтии кишвар бо сифати баланд сохта шуд.Бинои мазкур намуди хеле зебо дорад. Чанд даҳсола пеш дар маркази вилоят ба сохтмони чунин корхона оғоз карда буданд, аммо баъд аз пош хӯрдани Иттиҳоди Шӯравӣ ин сохтмон қатъ гардид. Ҳукумати ҷумҳурӣ бунёди онро дуюмбора шурӯъ карда, дар муддати кӯтоҳ бинои боҳашамат ва мутобиқ ба меъёрҳои биносозии муосир бунёд шуд. Муовини роҳбари Корхонаи воҳиди давлатии Хадамоти фармасевтӣ Мирзошо Имомов гуфт, ки дар чанд соли охир баробари боз шудани марзҳои кишвари мо аз давлатҳои хориҷӣ воридоти доруҳои худсохт зиёд шуд. Чунин вазъият дар Бадахшон низ ба назар мерасад. Барои ҷилавгирӣ аз воридоти доруҳои қалбакӣ Хадамоти фаъолиятӣ фармасевтӣ зарур донист, ки намояндагии худро дар маркази ноҳияи Шуғнон боз намояд. Дар бино як озмоишгоҳи муосир бо таҷҳизоти навтарин ҷойгир аст ва мутахассисон имкон доранд, ки ҳама гуна доруро дар фурсати кӯтоҳ мавриди ташхис қарор диҳанд.