« Неъмат» дар коркарди пахта фаъол аст

Кӯлоб, 25 сентябр. (АМИТ «Ховар», Сулаймон Холов).-Имрӯзҳо қабули пахта ва коркарди он дар корхонаҳои саноатии минтақаи Кӯлоб муташаккиллона ҷараён дошта, хоҷагиҳои деҳқонӣ ашёи хоми худро мувофиқи шартнома ба корхонаҳои мазкур равона месозанд. Дар ин самт Ҷамъияти дорои масъулияташ маҳдуди «Неъмат»-и ноҳияи Восеъ фаъол буда, то инҷониб 2200 тонна ашёи хомро ба корхона ворид ва коркард кардааст. Алихон Қурбонов, директори корхона гуфт, ки масъулини корхона бо 350 хоҷагии деҳқонӣ шартнома дошта, ашёи хомро аз роҳбарияти хоҷагиҳо бо нархи 500 долларӣ харида, барои коркард ба корхона ворид месозанд. Ба гуфтаи манбаъ дар айни ҳол корхона дар ду баст фаъолият дошта, 155 нафар коргар дорад. Корхона дар ҳолати таъмин будан бо ашёи хом ва доимӣ будани барқ метавонад то 20 000 тонна ашёи хомро коркард намояд.