«Оқилаи ҳикмат» бонувони ҳунарро ба камол мерасонад

Душанбе, 27 сентябр.(АМИТ «Ховар», Марзия Саидова).-Дар пойтахт озмун –викторинаи «Оқилаи ҳикмат», ки байни духтарони мактабу гимназияҳои пойтахт доир гардида буд, ҷамъбаст шуд. Озода Бобоева- муовини директори гимназияи №53 -и пойтахт дар сўҳбат ба хабарнигори АМИТ «Ховар» гуфт, ки чорабинӣ бо ибтикори шўъбаи кор бо занон ва оилаи шаҳри Душанбе дар доираи татбиқи Қарори раиси шаҳри Душанбе Маҳмадсаид Убайдуллоев «Дар бораи тасдиқи нақшаи чорабиниҳо оид ба татбиқи Стратегияи миллии фаъолгардонии нақши занон дар Ҷумҳурии Тоҷикистон барои солҳои 2011-2020 дар шаҳри Душанбе» гузаронида шуд. Ҳадафи он тарбияи ҷавондухтарон дар рўҳияи худшиносию эҳтиром ба арзишҳои миллӣ, рушди маънавиёти фарҳангию сиёсӣ ва баланд бардоштани маърифати ҳуқуқии ҷавондухтарон дар самти созандагию бунёдкорӣ дар ҷомеа, ҷилавгирии ҳар гуна зуҳуроти номатлуб дар байни духтарон аст. Озода Бобоева афзуд, ки озмунсоли дуюм гузаронида мешавад ва аз 4 шарт иборат буда, дар он гурўҳҳои 5 нафарӣ аз гимназияҳои рақамҳои 53 ва 9 ширкат намуданд. Ҷавондухтарон аз рўи шартҳои «Сухангустар», «Оқила», «Бонуи ҳунар» ва «Орифа» дар озмун иштирок намуда, ҳунару истеъдоди худро нишон доданд. Ба ғолибони озмун тўҳфаҳои мақомоти иҷроияи маҳаллии ҳокимияти давлатӣ дар шаҳри Душанбе тақдим шуданд. 13.33.