Парлумон лоиҳаи қонуни навро баррасӣ намуд

Душанбе, 25 сентябр.(АМИТ «Ховар», Марзия Саидова).-«Лоиҳаи Қонуни Ҷумҳурии Тоҷикистон «Дар бораи шарикии давлат ва бахши хусусӣ» бо мақсади дастгирӣ ва рушди минбаъдаи соҳибкорӣ, ҷалби сармояи дохиливу хориҷӣ ва иштироки фаъоли бахши хусусӣ дар рушди мамлакат дар асоси Паёми Президенти кишвар ба парлумон таҳия гардидааст. Ин матлабро раиси Кумитаи иқтисод ва молияи палатаи поёнии парлумони мамлакат Сафаралӣ Раҷабов дар ҷараёни баргузории ҷаласаи Шўрои Маҷлиси намояндагон, ки 25 сентябр таҳти раёсати Шукурҷон Зуҳуров, раиси Маҷлиси намояндагон доир гардид, иброз дошт.Зикр шуд, ки лоиҳаи қонуни мазкур асосҳои ҳуқуқӣ, иқтисодӣ ва ташкилии ҳамкории давлат ва бахши хусусиро муайян ва тартиби амалӣ кардани лоиҳаҳои шарикии давлат ва бахши хусусиро дар соҳаи инфрасохторӣ ва хизматрасонии иҷтимоӣ муқаррар мекунад ва ҳифзи ҳуқуқу манфиатҳои қонунии давлат ва бахши хусусиро таъмин менамояд.