Пешгирӣ аз қочоқи тилло ба Афғонистон

Душанбе, 24 сентябр. (АМИТ «Ховар», Мавҷуда Анварӣ). – Охири ҳафтаи гузашта сарҳадбонони тоҷик дар нуқтаи гузаргоҳи сарҳадии Панҷи Поён дар рафти тафтиши воситаҳои нақлиёт қочоқи миқдори зиёди тилло ва асъори хориҷиро пешгирӣ намуданд. Сардори маркази матбуоти Сарраёсати қӯшунҳои сарҳадии КДАМ Хушнуд Раҳматуллоев ба хабарнигори АМИТ «Ховар» иттилоъ дод, ки сарҳадбонони тоҷик ҳангоми тафтиши мошини шахсии КАМАЗ, ки ба сокини 50-солаи шаҳри Қурғонтеппа тааллуқ дошт, дар кабинаи он махфигоҳ ёфтанд, ки дар дохили он 2 кг 100 грамм маводи тилло ва 50 ҳазор доллари ИМА пинҳон карда шуда буд. Зимни тафтишот маълум гардид, ки ронанда ният дошт ин миқдор тилло ва асъори хориҷиро ба Ҷумҳурии Исломии Афғонистон интиқол диҳад.Нисбат ба ин ҳодиса парвандаи ҷиноӣ боз шуда, тафтишот идома дорад.