Пирӯзии дуввуми футболбозони наврас

Душанбе, 26 cентябр. (АМИТ «Ховар», Аловиддин Бӯриев). – Дастаи мунтахаби наврасони Тоҷикистон дар силсилаи бозиҳо барои Ҷоми Президенти Туркманистон бо футболбозони Беларус қувваозмоӣ карда, бо ҳисоби 2 бар 1 пирӯз шуданд. Ҳамлагари дастаи «Регар ТадАЗ» Комрон Турсунов дар ин дидор муаллифи ду гол шуд. Акнун футболбозони навраси кишварамон дар дидори нимниҳоӣ бо тими мунтахаби соҳибони майдон- Туркманистон пагоҳ дар соати 15 вориди майдон мешаванд. Ёдрас мешавем, ки дастпарварони Нӯъмон Юсупов аз ин пештар дастаи Ӯзбекистонро бо натиҷаи қотеъи 4 бар 0 шикаст дода, аз украиниҳо бо ҳисоби 3 бар 0 мағлуб шуда буданд. Дар ҷуфти дуввуми бозии нимниҳоӣ дастаи мунтахаби Украина ва Русия вомехӯранд. Ғолиби бозиҳо соҳиби Ҷоми Президенти Туркманистон ва 20 000 доллари амрикоӣ гашта, барандаи мақоми дуввум бо 10 000 доллар ва ҷои сеюм бо 5 000 доллар мукофоти нақдӣ сарфароз мегарданд.