Равобити байнипарлумонӣ рушд меёбад

Душанбе, 25 сентябр. (АМИТ «Ховар», Покиза Маҳмадбекова).- Бо даъвати Бундестаги Олмон 24 сентябр сафари ҳайати парлумонии Ҷумҳурии Тоҷикистон ба Ҷумҳурии Федеративии Олмон оғоз ёфт.Ба ҳайат вакилони Маҷлиси намояндагони Маҷлиси Олии Ҷумҳурии Тоҷикистон шомиланд.Тавре ки аз Раёсати иттилоот, матбуот, таҳлил ва тарҳрезии сиёсати хориҷии Вазорати корҳои хориҷии Ҷумҳурии Тоҷикистон ба АМИТ «Ховар» хабар доданд, дар доираи ин сафар мулоқоту сӯҳбатҳои вакилони парлумони Тоҷикистон бо раис ва аъзои гурӯҳи парлумонии «Олмон-Осиёи Марказӣ»-и Бундестаги Ҷумҳурии Федеративии Олмон, роҳбарон ва аъзои кумитаҳои парлумони Олмон оид ба масъалаҳои иқтисодиёт ва технологияҳо, сиёсати иҷтимоӣ, ҳуқуқ, сиёсати хориҷӣ ва мудофиа сурат мегирад. Ҳайати Тоҷикистонро муовини раиси Бундестаг ҷаноби Эдуард Освалд ба ҳузур мепазирад.Дар ҷараёни сафар ҳамчунин мулоқоти ҳайати Тоҷикистон дар Вазорати корҳои хориҷии Ҷумҳурии Федеративии Олмон ва сӯҳбатҳо бо намояндагони бунёдҳои сиёсӣ ва аҳли тиҷорати Олмон низ дар назар аст.