Рисолаи нави Камолиддинов

Душанбе, 19 сентябр. (АМИТ «Ховар», Раъно Нусратуллоева).-Китоби нави доктори илмҳои филология, Ходими шоистаи илму техникаи Тоҷикистон, профессори кафедраи услубшиносӣ ва таҳлили адабии факултаи журналистикаи Донишгоҳи миллии Тоҷикистон Баҳриддин Камолиддинов «Синонимияи синтаксисӣ дар забони адабии имрӯзаи тоҷик» аз чоп баромад.
Рисолаи илмӣ ба масъалаи мубрами забоншиносии муосир-синонимияи сарфу наҳв дар забони адабии тоҷикӣ бахшида шудааст. Профессор Баҳриддин Камолиддинов муаллифи бисёр рисолаҳои илмӣ, аз қабили «Забон ва услуби Ҳаким Карим», «Синонимияи синтаксисӣ ва фарҳанги нутқ», маҷмӯаи мақолаҳои «Масъалаҳои баҳсталаби синтаксиси забони тоҷикӣ» ва ғайра мебошад. Мавсуф дар татбиқи принсипҳои Қонун дар бораи забони давлатӣ, табъу таҳрири китобҳои дарсӣ ва воситаҳои таълимӣ барои мактабҳои миёна ва донишкадаҳои олии ҷумҳурӣ, ҳамчунин тарбияи олимони ҷавони бахши забоншиносӣ фаъолона иштирок менамояд.