«Рустам ва Сӯҳроб» дар Театри ҷавонон

Душанбе, 6 август. (АМИТ «Ховар», Мавҷуда Анварӣ). — Имрӯз соати 18.00 Театри давлатии ҷавонони ба номи М. Воҳидов мавсими нави театриро бо намоишномаи «Рустам ва Сӯҳроб», аз рӯи асари Абулқосим Фирдавсӣ оғоз менамояд. Дар ин бора Зиёбой Тошев, муовини директори Театри мазкур ба хабарнигори АМИТ «Ховар» иттилоъ дод. З. Тошев гуфт, ки намоишнома ба 21 солагии Истиқлолияти кишвар бахшида шудааст. Коргардони таҳиягар – Ҳунарпешаи шоистаи Тоҷикистон Султон Усмонов буда, дар он ҳунармандон Қурбони Собир, Абдумӯъмин Шарифӣ, Қамариддин Мирзоев, Сӯҳроб Ҷанҷолов, Бунёд Комилов, Моҳпайкар Ёрова, Заррина Бадалова ва дигарон нақш мебозанд. «Рустам ва Сӯҳроб» то 10 сентябри соли ҷорӣ ба тамошобинон пешкаш мешавад.