Ш.Саид — роҳбари аҳли тиҷорати ЭКСПО «Чин-АвруОсиё»

Душанбе, 7 сентябр.(АМИТ «Ховар», Покиза Маҳмадбекова).- Бо ибтикори ҷониби Чин раиси Палатаи савдо ва саноати Тоҷикистон Шариф Саид роҳбари аҳли тиҷорати «ЭКСПО-АвруОсиё» интихоб гардид. Тавре ки аз Палатаи савдо ва саноати ҷумҳурӣ ба АМИТ «Ховар» хабар доданд, «Корпоратсияи сохтмонии Синҷон» дар ҳошияи намоишгоҳи дуюми «ЭКСПО-АвруОсиё» дар шаҳри Урумчӣ ба манзури рушду густариш бахшидани ҳамкории байни давлатҳои иштироккунандаи ЭКСПО чорабинии махсусро роҳандозӣ намуд. Дар ин маросим ҷониби Чин пешниҳод намуд, ки раиси Палатаи савдо ва саноати Тоҷикистон роҳбари соҳибкорони кишварҳои иштироккунандаи «ЭКСПО-АвруОсиё» интихоб карда шавад. Шариф Саид зикр намуд, ки Тоҷикистон ба ояндаи ҳамкории Тоҷикистону Чин бо нияти нек назар карда, итминон дорад, ки ҳамкории ҳарду кишвар минбаъд ҳам густариш хоҳад ёфт.