Шикасти тими «Дордой» аз «Истиқлол»

Душанбе, 25 сентябр. (АМИТ «Ховар», Саидэҳсони Солеҳ).- Сабқат барои ба даст овардани Ҷоми президенти Конфедератсияи футболи Осиё (АФК) аз дирӯз дар шаҳри Душанбе шурӯъ шуд. Дар бозии аввал миёни дастаи «Истиқлол»-и Душанбе бо футболбозони «Дордой»-и Бишкек, ки соати 16-00 шурӯъ гардид, футболбозони тоҷик ҳарифони қирғизи худро бо ҳисоби 2 бар 0 мағлуб карданд. Голи аввали дастаи «Истиқлол»-ро дар дақиқаи 39-ум Даврон Эргашев бо сар вориди дарвозаи ҳарифон кард. Голи дуввуми дастаи «Истиқлол»-ро Маҳмадалӣ Содиқов дар нимаи дуюми бозӣ дар дақиқаи 60-ум ба ҳадаф расонд.  Бозии дуюм миёни дастаҳои «Тайван Пауэр Компани» – «Ал-Аммарӣ» соати 19.00 шурӯъ шуд, ки ин бозӣ мусовӣ: бо натиҷаи 1-1 анҷом ёфт. Сабқатҳо миёни 6 дастаи Осиё то рӯзи 30-уми сентябр идома мекунанд. Ва ғолиби бозӣ бо 50 ҳазор доллар қадрдонӣ мешавад.