Тӯҳфаи «Тоҷик Эйр» ба Донишгоҳи техникӣ

Душанбе, 5 сентябр.(АМИТ «Ховар», Покиза Маҳмадбекова).- Чанде пеш Ҷамъияти саҳҳомии кушодаи «Тоҷик Эйр» ҳавопаймои сохти шӯравии «Як-40»-ро ки ҳоло мавриди истифода қарор надорад, ба Донишгоҳи техникии Тоҷикистон тақдим намуд. Тавре ки аз «Тоҷик Эйр» ба АМИТ «Ховар» хабар доданд, ин ҳавопаймо чун воситаи таълимӣ барои донишҷӯёни донишгоҳи мазкур истифода мешавад. Мувофиқи суханони манбаъ, ҳавопаймои зикршуда беш аз 20 сол дар ширкати «Тоҷик Эйр» мавриди истифода қарор гирифта, дар хатсайрҳои Душанбе-Бишкек, Душанбе-Алмаато ва Душанбе-Хоруғ парвоз мекард.