Таҷлили Рӯзи ҳавопаймоии мулкӣ дар «Сомон Эйр»

Душанбе, 4 сентябр.(АМИТ «Ховар», Покиза Маҳмадбекова). – 3 сентябр кормандони Ҷамъияти масъулияташ маҳдуди (ҶММ) Ширкати ҳавопаймоии «Сомон Эйр» Рӯзи ҳавопаймоии мулкиро таҷлил намуданд. Тавре ки аз ширкати мазкур ба АМИТ «Ховар» хабар доданд, дар ситоди Ҷамъияти кушодаи саҳҳомии «Тоҷик Эйр» бахшида ба Рӯзи ҳавопаймоии мулкӣ маҷлиси ботантана баргузор гардид. Баъди анҷоми қисми расмии ҷаласа маросими мукофотонидани кормандони фаъол ва собиқадорони ҳавопаймоии мулкӣ баргузор гардид. Қумандони киштии ҳавоӣ Шамсиддин Баротов ва муҳандиси бахши техникӣ Маҳмадкарим Исматов аз Ширкати ҳавопаймоии «Сомон Эйр» сазовори медали «Нақлиётчии фахрӣ»-и Вазорати нақлиёти Ҷумҳурии Тоҷикистон гардида, муҳандиси бахши техникӣ Олег Нарушев, роҳбаладон Хуршед Назаров ва Ҷаҳонгир Бобоев, ҳамчунин нозири бахши хизматрасонӣ Тоҳир Раҷабов бо ифтихорномаи Вазорати нақлиёти Ҷумҳурии Тоҷикистон ва халабони ширкати ҳавопаймоии «Сомон Эйр» Файзулло Сатторов бо медали «Собиқадори меҳнат» қадр карда шуданд.