Ёде аз устод Носирҷон Маъсумӣ

Душанбе, 14 сентябр. (АМИТ «Ховар», Раъно Нусратуллоева). -Имрӯз дар Китобхонаи миллии Тоҷикистон конфронси ҷумҳуриявии адабӣ таҳти унвони «Мақоми устод Носирҷон Маъсумӣ дар илму адаби тоҷик» баргузор гардид, ки дар он китоби Носирҷон Маъсумӣ «Очеркҳо оид ба инкишофи забони адабии тоҷик» дар нашри дуввум муаррифӣ шуд. Конфронсро директори Китобхонаи миллии Тоҷикистон Носирҷон Салимов ифтитоҳ намуд. Дар ҷамъомад олимон, адибон, муҳаққиқон иштирок намуда, маърӯза ва гузоришҳои олимон М. Муллоаҳмадов, Ғ.Ҷӯраев, Б.Камолиддинов, А.Юнусов дар мавзӯъҳои «Саҳми Носирҷон Маъсумӣ дар адабиёти тоҷик», «Носирҷон Маъсумӣ -забоншиноси маъруф», «Очеркҳо оид ба забони ҳозираи тоҷик» ва нақши он дар услубшиносии тоҷик шунида шуд.Носирҷон Маъсумӣ яке аз муҳаққиқонест, ки монанди бисёре аз адибони тоҷик фаъолияти адабии худро аз шеър оғоз кардааст. Бузургтарин асари Н.Маъсумӣ дар даврони ҷанг манзумаи «Мулки саодат» мебошад. Фаъолияти Маъсумӣ дар арсаи забоншиносӣ низ чашмгир аст. Ӯ доир ба таърихи забон, забони адабии муосир, услубшиносӣ, маданияти сухан ва забоншиносии иҷтимоӣ асарҳои муҳиме офаридааст. Баъд аз анҷоми конфронс дар як гӯшаи китобхона китобҳои Носирҷон Маъсумӣ ба намоиш гузошта шуданд, ки аҳли адаб аз он дидан карданд.