Қонуне, ки фаъолияти савдоро ба танзим медарорад

Душанбе, 15 октябр.(АМИТ «Ховар», Марзия Саидова).-Дар ҷаласаи Шўрои Маҷлиси намояндагони Маҷлиси Олии Ҷумҳурии Тоҷикистон, ки 15-уми октябр таҳти раёсати Шукурҷон Зуҳуров –раиси палатаи поёнии парлумон доир гардид, лоиҳаи як силсила қонунҳои Ҷумҳурии Тоҷикистон, ки ба рушди иқтисодиёти кишвар муосидат менамоянд, баррасӣ гардид. Тибқи иттилои котиби матбуотии Маҷлиси намояндагон Муҳаммадато Султонов, аъзои Шўро лоиҳаи Қонуни Ҷумҳурии Тоҷикистон «Дар бораи фаъолияти савдо ва хизматрасонии маишӣ дар Ҷумҳурии Тоҷикистон»-ро муҳокима карданд. Зикр шуд, ки лоиҳаи ин қонун бо мақсади асоснок ва воқеӣ истифода бурдани тадбирҳои танзими давлатии савдои чакана, хўроки умумӣ ва хизматрасонии маишӣ ба аҳолӣ, бартараф намудани дахолати беасоси мақомоти давлатӣ ба танзими савдои чакана, ҳимояи бозори молҳо ва хизматрасониҳои таъиноти истеъмолӣ, ҳимояи ҳуқуқ ва манфиатҳои қонунии шахсони воқеӣ ва ҳуқуқӣ, таъмини интиқоли озоди молҳо ва хизматрасониҳои таъиноташон истеъмолӣ дар қаламрави Ҷумҳурии Тоҷикистон таҳия шудааст.Тазаккур дода шуд, ки бобҳои алоҳидаи лоиҳаи қонуни мазкур ба назорати давлатӣ ва санҷиш дар соҳаи савдои чакана, хўроки умумӣ ва хизматрасонии маишӣ ба аҳолӣ, пешбурди баҳисобгирӣ ва ҳисоботдиҳӣ, гузаронидани санҷишҳо, масъалаҳои коргузорӣ, таъминоти кадрӣ, талаботи умумӣ ба кормандон, таълими тахассусии онҳо, омодагии касбӣ ва ҳамчунин гузаронидани муоинаи тиббӣ бахшида шудааст.