Ҳамгироии Осиёи Марказӣ ба савдои ҷаҳонӣ

Душанбе, 8 октябр. (АМИТ «Ховар», Пайрав Назаров). – Аз 15 то 16 октябр дар осоишгоҳи «Баҳористон», — и шаҳри Қайроққуми вилояти Суғд конфронс бахшида ба масоили ҳамгироии кишварҳои Осиёи Марказӣ ба савдои ҷаҳонӣ баргузор мегардад. Аз намояндагии Иттиҳоди Аврупо дар Тоҷикистон дар ин бора ба АМИТ «Ховар» хабар доданд. Дар конфронс масоили рушди механизми Ҳамкории иқтисодии Осиёи Марказӣ мавриди муҳокима қарор гирифта, ба масъалаҳои ҳамоҳангсозии қонунгузориҳои миллӣ ба меъёру қоидаҳои байналмилалӣ таваҷҷӯҳи хоса дода мешавад. Дар конфронс кормандони сохторҳои дахлдори давлатӣ, намояндагони бахши инфиродӣ ва созмонҳои ҷаҳонию дохилӣ ширкат мекунанд. Дар рӯзҳои конфронс намоишгоҳи маводи ғизоии истеҳсоли ватанӣ доир мегардад.