Ҷаласаи Шӯрои танзимотии прокурорҳои генералӣ

Душанбе, 3 октябр. (АМИТ «Ховар», Лутфия Эшонқулова). – 2 октябр дар шаҳри Киев ҷаласаи Шӯрои танзимотии прокурорҳои генералии давлатҳои аъзои Иттиҳоди Давлатҳои Мустақил баргузор гардид. Мувофиқи хабари намояндаи Прокуратураи генералии Тоҷикистон, дар кори ҷаласа ҳайатҳои Озарбойҷон, Арманистон, Беларус, Қазоқистон, Қирғизистон, Молдова, Русия, Украина, ҳамчунин ҳайати Тоҷикистон бо роҳбарии Прокурори генералии ҷумҳурӣ Шерхон Салимзода иштирок намуданд.Дар ҷаласа ҷараёни иҷрои барномаҳои тадбирҳои муштарак, аз ҷумла муборизаи зидди ҷинояткорӣ, терроризм, зуҳуроти дигари ифротталабӣ ва ғайра мавриди муҳокима қарор гирифтанд.Қобили зикр аст, ки Шӯрои танзимотии прокурорҳои генералии давлатҳои аъзои ИДМ бо қарори муштараки прокурорҳои генералии кишварҳои Иттиҳод 7 декабри соли 1995 таъсис ёфта, 25 январи соли 2000 – ум мақоми байнидавлатиро пайдо намуд.