Ҷаласаи ситоди «Ҳаҷ-2012» дар Макка

Душанбе, 12 октябр. (АМИТ «Ховар», Дилшодаи Хайруллоҳ)- Дар меҳмонхонаи Бофил воқеъ дар Маккаи мукаррамаи Арабистони Саудӣ ҷаласаи ситоди «Ҳаҷ-2012» доир гардид. Тавре ки аз Кумитаи корҳои дини назди Ҳукумати ҶТ хабар доданд, дар ҷаласа масоили шароити будубоши зоирини тоҷик дар меҳмонхонаҳои Маккаи мукаррама ва Мадинаи мунаввара баррасӣ шуданд. Дар ҷаласа ҳамчунин масъалаҳои вобаста ба ҷобаҷонамоии ҳоҷиён дар меҳмонхонаҳо, таъмини онҳо бо шароити хуби иқомат ва хизматрасониҳои тиббӣ мавриди таҳлилу баррасӣ қарор гирифт.Раиси ситоди «Ҳаҷ-2012» Ҷумъахон Ғиёсов зимни суханронӣ аз масъулин даъват намуд, ки барои дар сатҳи баланд гузаронидани мавсими ҳаҷи имсола тамоми чораҳои зарурӣ андешида шавад. Дар ҷаласа ҳамчунин аз вазъи ҳоҷиёни дорои бемориҳои гуногун сухан рафт ва барои муолиҷаи саривақтии онҳо аз ҳайати табибон даъват шуд, ки барои расонидани хизматрасониҳои тиббӣ аз тамоми имкониятҳои дастрас истифода намоянд.