Ҷонибдории пешниҳодоти ҳукумат аз тарафи парлумон

Душанбе, 3 октябр.(АМИТ «Ховар», Марзия Саидова).- Вакилони парлумони кишвар пешниҳоди Ҳукумати мамлакатро дар хусуси ворид намудани иловаҳо ба Буҷети давлатии Ҷумҳурии Тоҷикистон барои соли 2012 ҷонибдорӣ намуданд. Тибқи иловаҳо ба Буҷети давлатии кишвар ширкати холдингии саҳомии «Барқи тоҷик” барои воридоти 30 ҳазор тонна мазути камсулфур барои эҳтиёҷоти Маркази барқу гармидиҳии шаҳри Душанбе аз пардохти андоз ва боҷи гумрукӣ озод мешавад. Маблағи пардохтҳои гумрукӣ 34, 7 миллион сомониро ташкил медиҳад. Назар ба иттилои Руҳуллоҳ Ҳакимов –муовини вазири молияи кишвар ҳамзамон тибқи ворид намудани иловаҳо ба Буҷети давлатии ҷумҳурӣ барои соли 2012 корхонаи муштараки Тоҷикистону Канада — «Апреловка» бо мақсади ворид намудани техникаю таҷҳизоти наву замонавӣ, зиёд намудани ҳаҷми истеҳсоли металлҳои қиматбаҳо ба маблағи 12, 5 миллион сомонӣ аз пардохтҳои гумрукӣ озод мегардад. Дар мавриди насб кардани техникаю таҷҳизоти муосир корхона ҳаҷми истеҳсоли тиллоро то 2,2 тонна ва нуқраро 7,7 тонна мерасонад. Ҳамзамон дар асоси иловаҳо ба Буҷети давлатии ҷумҳурӣ барои соли равон Вазорати кишоварзии кишвар барои овардани 20 сар чорвои калон-говҳои зотӣ аз Ҷумҳурии Беларус аз пардохтҳои гумрукӣ озод карда шуд. Зикр гардид, ки ворид намудани чорвои хушзот аз хориҷи кишвар имкон медиҳад, ки бозори истеъмолии мамлакат бо маҳсулоти истеҳсоли худӣ таъмин гардида, дар маҷмўъ самаранокии соҳаи чорводорӣ баланд бардошта шавад.