А. Сичев ба Тоҷикистон меояд

Душанбе, 17 октябр. (АМИТ «Ховар», Лутфия Эшонқулова). – 18 октябр Намояндаи навтаъйини минтақавии Раёсати Созмони Милали Муттаҳид оид ба маводи мухаддир ва ҷиноят дар Осиёи Марказӣ Александр Николаевич Сичев барои боздиди аввали корӣ ба Ҷумҳурии Тоҷикистон меояд. Мувофиқи хабари маркази матбуоти Агентии назорати маводи мухаддири назди Президенти ҶТ, А. Сичев дар ҷараёни сафараш бо роҳбарони вазоратҳои ҶТ, аз ҷумла, директори Агентии назорати маводи мухаддири назди Президенти Ҷумҳурии Тоҷикистон Рустам Назаров, ҳамчунин бо намояндагони сафоратҳои ИМА ва Ҷопон дар ҶТ, роҳбарони созмонҳои байналмилалии Созмони Милали Муттаҳид воқеъ дар Тоҷикистон мулоқотҳо анҷом медиҳад. Ҷонибҳо дурнамои ҳамкорӣ дар муборизаи зидди гардиши ғайриқонунии маводи мухаддирро мавриди муҳокима қарор хоҳанд дод.Қобили зикр аст, ки ин нахустин сафари кории Александр Сичев дар мансаби намояндаи минтақавии СММ дар Осиёи Марказӣ мебошад, ки рӯзи ҷумъаи 19 октябри соли равон ба анҷом мерасад.