Афзоиши содироти маҳсулоти ватанӣ

Душанбе, 4 октябр. (АМИТ «Ховар», Дилшодаи Хайруллоҳ).- Содироти мол ба хориҷи кишвар омили пешрафти соҳаҳои гуногуни иқтисодиёти кишвар маҳсуб меёбад. Инро ба инобат гирифта, корхонаҳои соҳаи маводи сохтмони ҷумҳурӣ фурӯши якчанд намуди масолеҳи сохтмониро берун аз кишвар ба роҳ мондаанд. Тибқи иттилои котиботи Вазорати энергетика ва саноати ҶТ дар нӯҳ моҳи соли ҷорӣ 44,5 ҳазор тонна қуми квартсӣ ба маблағи 1 миллиону 111 ҳазору 750 доллари ИМА ба Ҷумҳурии Ӯзбекистон, 36,1 тонна ранги ҳархела ба маблағи 20 ҳазор доллари ИМА, 76,8 тонна андоваи минералӣ (шпатклевка) ба маблағи 43,3 ҳазор доллари ИМА ва 4,9 тонна таҳранг (грунтовка) ба ҷумҳуриҳои Қирғизистон ва Афғонистон содир шудааст.