Баррасии усулҳои шаффофи пардохти андоз
Душанбе, 5 октябр. (АМИТ «Ховар», Дилшодаи Хайруллоҳ)- Бо мақсади иҷрои дастуру супоришҳои Роҳбари давлат ҷиҳати тақвияти корҳои фаҳмондадиҳиву тавзеҳотӣ дар Кумитаи андози назди Ҳукумати Ҷумҳурии Тоҷикистон бо иштироки мутахассисони соҳа ва доираи васеи андозсупорандагони ноҳияҳои Фирдавсӣ ва Исмоили Сомонии шаҳри Душанбе семинар баргузор шуд. Дар он паҳлуҳои гуногуну муҳими Кодекси андоз дар таҳрири нав мавриди омӯзишу баррасӣ қарор дода шуд. Дар чорабинӣ кормандони соҳа сараввал ба андозсупорандагон оид ба зарурат ва моҳияти таҳияи Кодекси андоз дар таҳрири нав, бартариятҳои асосии Кодекси андоз дар таҳрири нав аз Кодекси амалкунанда, ҳуқуқу уҳдадориҳои андозсупорандагон, имтиёзҳои барои онҳо пешбинишуда, истифодаи усули баҳодиҳии хавфҳо ҳангоми таъини санҷишҳои андоз, чораҳои мубориза бар зидди саркашӣ аз андозбандӣ маълумоти муфассал пешниҳод намуданд. Ҳамзамон мутахассисони мақомоти андоз ба соҳибкорон аз хусуси шароит, мӯҳлат ва роҳу усулҳои соддаю шаффофи пардохти маблағҳои андоз маълумот дода, таъкид намуданд, ки андозсупорандагон бояд уҳдадориҳои қонунии худро оид ба пардохти андозҳо риоя намоянд. Ҳамчунин атрофи низомҳои соддакардашудаи андозбандӣ, асосҳои андозбандии минтақаҳои озоди иқтисодӣ ва андозҳои маҳаллӣ муҳокимаҳо сурат гирифтанд.Ба иштирокчиёни семинар китоби Кодекси андоз дар таҳрири нав, ки онро Кумитаи андоз ба тозагӣ ба чоп расонидааст, ба таври ройгон тақсим шуда, ба онҳо тавсия дода шуд, ки бо муқаррароти он пурратар шинос шаванд. Дар назар аст, ки китоби Кодекси андоз дар таҳрири нав ба тамоми вазорату идораҳои дахлдор ва андозсупорандагон ройгон дастрас мешавад.








Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд
Мардуми ноҳияи Рашт дар симои Пешвои миллат наҷотбахши миллату давлат, кафили сулҳу ваҳдат ва эҳёгари фарҳанги миллиро мебинанд






