Бишкек: Баррасии масоили Афғонистон

Душанбе, 19 октябр. (АМИТ «Ховар», Мавҷуда Анварӣ).- Дирӯз дар шаҳри Бишкек Ҷаласаи чоруми муовинони вазирони корҳои хориҷии кишварҳои Осиёи Марказӣ баргузор гашт. Ҷаласаи мазкур ҳамасола бо ибтикори Маркази минтақавии СММ оид ба дипломатияи боздоранда барои Осиёи Марказӣ баргузор мегардад. Дар ҷаласаи имсола намояндагони кишварҳои Осиёи Марказӣ, роҳбари маркази номбурда, котиботи СММ ва намояндагии СММ дар Афғонистон ширкат варзиданд. Дар се бахши ҷаласа масъалаҳои марбут ба арзёбии фаъолияти Маркази минтақавии СММ тайи панҷ соли гузашта, тавсияҳо дар мавриди таҳкими иқтидори минбаъдаи он бо назардошти хуруҷи қарибулвуқуи Нерӯҳои байналмилалӣ аз ҳудуди Афғонистон мавриди арзёбӣ қарор гирифт.Дар ҷаласа муовини аввали вазири корҳои хориҷии Ҷумҳурии Тоҷикистон Маҳмудҷон Собиров кишварро намояндагӣ намуда, ба фаъолияти марказ баҳои мусбат дод ва ҷиҳати баланд бардоштани самаранокии фаъолияти минбаъдаи он пешниҳодҳои мушаххас ироа кард.Дар ин бора аз Вазорати корҳои хориҷии кишвар ба АМИТ «Ховар» иттилоъ доданд.