Дар Душанбе 20-соли саҳифаи зарринро варақ мегардонанд

Душанбе, 23 октябр. (АМИТ «Ховар», Марзия Саидова).- «Нақши таърихии иҷлосияи Шўрои Олии Ҷумҳурии Тоҷикистон дар таҳкими давлатдории тоҷикон ва рушди қонунгузорӣ»- зери чунин унвон фардо, 24 октябр дар Душанбе суҳбати мизи мудаввар доир мегардад, ки Маркази миллии қонунгузории назди Президенти Ҷумҳурии Тоҷикистон созмондиҳандаи ин чорабинист. Назар ба иттилои Малоҳати Зайниддин- корманди Маркази миллии қонунгузории назди Президенти ҷумҳурӣ ба чорабинӣ кормандони мақомоти адлия ва Шўрои адлия даъват шудаанд. Интизор меравад, ки иштирокдорони нишаст атрофи иҷлосияи 16-уми Шўрои Олии Ҷумҳурии Тоҷикистон ва рушди қонунгузории авф дар даврони истиқлолият, нақши иҷлосияи 16-ум Шўрои Олии Ҷумҳурии Тоҷикистон дар бунёди ҷомеаи демократии ҳуқуқбунёд ва дунявӣ, таъмини истиқлолияти давлатӣ, 20-солагии саҳифаи заррини давлати тоҷикон ва истиқлолияти давлати Тоҷикистон ва аҳамияти иҷлосияи16-уми Шўрои Олии Ҷумҳурии Тоҷикистон дар ташаккули давлатдории миллӣ табодули назар хоҳанд намуд.