Донишҷӯёни Хатлон ба пахтачинӣ ҷалб намешаванд

Қӯрғонтеппа, 2 октябр. (АМИТ «Ховар», Мурод Сотиев). – Пахтакорони вилояти Хатлон беш аз 70 фоизи ҳосилро ҷамъоварӣ кардаанд.Тавре ки муовини сардори Раёсати кишоварзии вилояти Хатлон Нозира Сафарова ба мухбири АМИТ «Ховар» хабар дод, то 1 октябр 189 ҳазору 614 тонна пахта чида шудааст, ки ин 71,96 фоизи дурнамои солонаро ташкил медиҳад. Мувофиқи маълумоти Раёсати кишоварзии Хатлон, имсол бояд 263 ҳазору 500 тонна пахта ғундошта шавад.Раиси вилояти Хатлон Ғ. Афзалов дар иҷлосияи Маҷлиси вакилони вилоят зикр намуд, ки ҷамъоварии пахта бо қувваи хоҷагиҳои деҳқонӣ сурат гирифта, донишҷӯёну хонандагон ба пахтачинӣ ҷалб карда намешаванд.