Фурудгоҳи Душанбе дар феҳристи пок қарор дорад?

Душанбе, 24 октябр. (АМИТ «Ховар», Саидэҳсони Солеҳ).-Имрўз намояндагони Агентии назорати молиявӣ ва мубориза бо коррупсияи кишвар дар «Фурудгоҳи байналмилалии Душанбе» вохўрӣ анҷом доданд. Муҳаммадюсуфи Шодӣ, сухангӯи ФБД бо таъйиди ин хабар гуфт: «Кормандони ин ниҳод дар мулоқот дар баробари фаҳмонидани пешгирии ҳолатҳои коррупсионӣ гуфтаанд, дар фаъолияти кормандони фурудгоҳ дар маҷмӯъ беҳбудӣ дида мешавад, вале ҳушдор додаанд, ки боз ҳушёртар бошанд, зеро кормандони Агентӣ маводи танқидии воситаҳои ахбори оммаро мутолиа намуда, пайваста меомўзанд ва дар аксари маврид мақолаҳоеро, ки дар онҳо ҳолатҳои коррупсионӣ ошкор мегарданд, мавриди санҷиш қарор медиҳанд». Дар рафти суҳбат иброз шуд, ки то имрўз ҶСК «Фурудгоҳи байналмилалии Душанбе» дар феҳристи пок қарор дорад ва аз ҷониби Агентӣ дар фурудгоҳи Душанбе ягон ҳодисаи дорои хусусияти коррупсионӣ ба қайд гирифта нашудааст.