Имзои ёддошт

Душанбе, 5 октябр. (АМИТ «Ховар», Покиза Маҳмадбекова). – Раиси Палатаи савдо ва саноати Ҷумҳурии Тоҷикистон Шариф Саид ва раиси Шӯрои соҳибкорону ассотсиатсияҳои танзимотӣ ва иттиҳодияҳои ҷамъиятии Тоҷикистон Зайд Саидов Ёддошти ҳусни тафоҳумро имзо намуданд. Тавре ки аз Палатаи савдо ва саноати Ҷумҳурии Тоҷикистон ба АМИТ «Ховар» хабар доданд, дар ин санад самтҳои асосии кор ба манзури дастгирии манфиатҳои тиҷорати миллӣ, фароҳам овардани шароити мусоиди маблағгузорӣ, ҳамкорӣ бо Ҳукумати Ҷумҳурии Тоҷикистон бо мақсади вусъат бахшидани кор барои ҷалби сармояҳои хориҷӣ ва роҳандозӣ намудани равобити тоҷирон бо намояндагиҳои тиҷоратию иқтисодии кишварҳои хориҷи наздик ва дур муайян карда шуданд. Дар ҷараёни мулоқот масъалаҳои дастгирии ҳуқуқию иҷтимоии соҳибкорӣ, таҳияи тавсияҳо бобати таъмини рушди минбаъдаи соҳибкорӣ дар истеҳсолот бо василаи ҷалби технологияҳо ва таҷҳизоти муосир ба иқтисодиёт мавриди муҳокима қарор гирифтанд.