Истеҳсоли маҳсулоти фулӯзӣ меафзояд

Душанбе, 24 октябр. (АМИТ «Ховар», Кристина Эрлих). – Тоҷикистон ҳаҷми истеҳсоли маҳсулоти фулӯзиро афзун намуд. Тайи 9 моҳи соли ҷорӣ дар ҷумҳурӣ 28 корхонаи тавлиди маҳсулоти фулӯзӣ рӯи кор оварда шудааст. Дар ин бора аз Вазорати энергетика ва саноати Ҷумҳурии Тоҷикистон ба Мухбири АМИТ «Ховар» хабар доданд. Мувофиқи суханони манбаъ, дар давраи ҳисобот қариб 20 ҳазор тонна маҳсулоти фулӯзӣ истеҳсол шуд, ки маблағи умумии он беш аз 38 миллион сомониро ташкил медиҳад. Маҳсулоти фулӯзӣ асосан барои сохтмони биною иншоотҳои якошёна истифода мешавад. Хотирнишон месозем, ки алҳол дар ноҳияи Ҳисор комбинати нави металлургӣ бунёд мегардад, ки иқтидори он дар марҳилаи аввал 200 ҳазор тонна маҳсулотро ташкил медиҳад.