Истеҳсоли маҳсулоти саноатӣ афзуд

Душанбе, 31 октябр. (АМИТ «Ховар», Лутфия Эшонқулова). – Тайи 9 моҳи соли равон ҳаҷми истеҳсоли маҳсулоти саноатии Тоҷикистон баробари 10,4 фоиз афзуд. Афзоиши истеҳсоли маҳсулоти саноатӣ аз ҳисоби афзун гардидани маҳсулоти корхонаҳои Вазорати энергетика ва саноат, аз ҷумла ШСХК «Барқи тоҷик», истихроҷи нафту газ, саноати ангишт, саноати истихроҷи маъдан ва маводи сохтмонӣ, ҳамчунин тавлиди маҳсулоти корхонаҳои пахтатозакунӣ ба даст омадааст.Мувофиқи маълумоти Агентии омор, ҳамзамон суръати афзоиши ҳаҷми истеҳсоли маҳсулоти саноатӣ нисбат ба ҳамин давраи соли гузашта баробари 1,3 фоиз коҳиш ёфтааст. Сабаби ин асосан паст шудани суръати афзоиш дар корхонаҳои коркарди пахта мебошад. Тайи 9 моҳи соли ҷорӣ дар саноати истихроҷи маъдан ба маблағи 860 миллиону 500 ҳазор сомонӣ маҳсулот истеҳсол шудааст. Ҳаҷми истеҳсолот дар соҳаи саноат дар ҳамин давра 461 миллиону 240 ҳазор сомониро ташкил дод.