Истеҳсоли маҳсулоти саноатӣ меафзояд

Душанбе, 22 октябр. (АМИТ «Ховар», Кристина Эрлих). – Дар Тоҷикистон афзоиши истеҳсоли маҳсулоти саноатӣ ба назар мерасад. Ҳаҷми истеҳсоли маҳсулот нисбат ба ҳамин давраи соли гузашта баробари қариб 11 фоиз афзудааст. Тавре ки аз Вазорати энергетика ва саноати ҶТ ба мухбири АМИТ «Ховар» хабар доданд, сабаби афзудани ҳаҷми маҳсулоти саноатӣ бунёди коргоҳу технологияҳои нав дар саноати нассоҷию дӯзандагӣ, бахши кимиё, истеҳсоли маснуоти резинӣ ва пластмассӣ мебошад. Қобили зикр аст, ки тайи моҳҳои январ – сентябри соли ҷорӣ ба маблағи беш аз 6 миллиарду 700 миллион сомонӣ маҳсулот истеҳсол шудааст. Корхонаҳои коркарди нахи пахта дар давраи ҳисобот ба маблағи 551 миллион сомонӣ маҳсулот баровардаанд, ки нисбат ба ҳамин давраи соли гузашта 1,7 баробар зиёд аст.Ғайр аз ин, аз ҷумлаи 952 корхонаи саноатӣ 681 корхона дараҷаи истеҳсоли маҳсулотро нисбат ба соли 2011 баланд бардоштаанд.