Истиқлолият ва саҳми ҷавонон

Душанбе, 8 октябр. (АМИТ «Ховар», Дилшодаи Хайруллоҳ)- 9 октябри соли равон дар толори Китобхонаи миллии Тоҷикистон конфронси олимон ва муҳаққиқони ҷавони Тоҷикистон ба истиқболи 20- солагии Иҷлосияи XXI-уми Шӯрои Олӣ, 15- солагии Рӯзи Ваҳдати миллӣ ва Рӯзи ҷавонони Тоҷикистон таҳти унвони «Истиқлолият ва ҷавонон» бо ширкати 120 нафар олими ҷавон аз муассисаҳои олии илмиву таълимии ҷумҳурӣ доир мегардад. Конфронс дар бахшҳои улуми ҷомеашиносӣ, дақиқ ва биологию тиб гузаронида мешавад ва 72 маърӯза мавриди баҳсу муҳокима қарор мегирад. Беҳтаринҳо сазовори диплому тӯҳфаҳои хотиравӣ хоҳанд гардид. Маҷмӯаи маърӯзаҳо таҳти унвони «Ҷавонон ва илми муосир» бо фарогирии 72 мақолаи илмӣ интишор хоҳад шуд.Дар ин бора аз Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон иттилоъ доданд.