Муассисаҳои тиббӣ ба давраи бӯҳрон омодаанд

Душанбе, 11 октябр. (АМИТ «Ховар», Мавҷуда Анварӣ). — Дирӯз дар Маркази хариди доруворӣ бо иштироки муовини аввали вазири тандурустии кишвар Саида Ҷобирова ва намояндагони муассисаҳои тандурустии 8 ноҳияи наздисарҳадӣ ҷамъомад баргузор гардид. Дар ҷамъомад барои муассисаҳои тандурустии 15 ноҳияи наздисарҳадӣ маводи зарурии тиббӣ тақсим карда шуд.Аз ҷониби Вазорати тандурустӣ дар якҷоягӣ бо намояндагии Ташкилоти ҷаҳонии тандурустӣ дар Ҷумҳурии Тоҷикистон дар доираи лоиҳаи «Тақвият додани иқтидори муассисаҳои тиббии ноҳияҳои наздисарҳадии Тоҷикистону Афғонистон оид ба хизматрасонии тиббӣ дар вақти буҳрон ва баъди он», ки аз тарафи Ҳукумати Ҷопон маблағгузорӣ мешавад, дар беморхонаи марказии ноҳияҳои Шӯрообод, Ҳамадонӣ, Фархор, Панҷ, Қумсангир, Ҷиликӯл, Қубодиён, Шаҳритус ва Носири Хусрави вилояти Хатлон, ноҳияҳои Дарвоз, Ванҷ, Рӯшон, Ишкошим, Роштқалъа ва Мурғоби ВМКБ корҳои барқароркунии системаи обрасонӣ, таъмири системаҳои барқ, гази табиӣ, таъмири автомобилҳои ёрии таъҷилӣ амалӣ намуда, шуъбаҳои ҷарроҳӣ, эҳёгарӣ, таваллуд ва беморони беморхонаҳои ноҳияҳои мазкур бо маҷмӯи таҷҳизоти тиббии травматологии силсилаи В, маҷмӯи таҷҳизоти тиббии асосии травматологӣ дар сумкаҳо ва маҷмӯи таҷҳизоти тиббии касбии момодоягӣ дар қуттии алюминӣ таъмин шуданд.Ҳамаи ин имконият медиҳад, ки дараҷаи сифати хизматрасонии тиббӣ дар шуъбаҳои ёрии фаврии тиббии беморхонаҳои мазкур дар ҳолати буҳронӣ баланд бардошта шуда, оқибати офатҳои табиӣ ва ҳама гуна ҳолатҳои фавқулодда коҳиш дода шавад.Дар ин бора аз маркази матбуоти Вазорати тандурустӣ ба АМИТ «Ховар» иттилоъ доданд.