Мулоқоти Сафири Тоҷикистон бо Намояндаи Конгресси ИМА

Душанбе, 12 октябр (АМИТ «Ховар»).-10 октябри соли 2012 Сафири Фавқулодда ва Мухтори Ҷумҳурии Тоҷикистон дар ИМА Нуриддин Шамсов бо Раиси зеркумитаи Конгресси ИМА оид ба умури Аврупо ва Авруосиё Дан Буртон мулоқот анҷом дод. Дар оғози мулоқот сафир ба ҳамсуҳбаташ роҷеъ ба роҳҳои минбаъдаи густариши ҳамкории дуҷонибаи сиёсӣ, иқтисодию тиҷоратӣ, сармоягузорӣ, низомию амниятӣ ва байнипарлумонӣ ибрози назар намуд. Зимни мулоқот сафир зарурати таҳияи лоиҳаҳои созишномаҳои дуҷонибаро оид ба канорагирӣ аз андозбандии дукарата ва саркашӣ намудан аз супоридани андоз аз даромад ва дар бораи ҳавасмандгардонӣ ва ҳимояи мутақобилаи сармоягузориҳо матраҳ кард. Дан Буртон аз пазироии самимӣ зимни сафари кориаш ба Тоҷикистон, ки моҳи июли соли ҷорӣ ба вуқуъ пайваст, изҳори сипос карда, гуфт, ки омода аст аз Тоҷикистон бо мақсади таҳкими робитаҳои дуҷонибаи гуногунпаҳлу ва мутақобилан судманд дубора боздид намояд. Ӯ Тоҷикистонро «кишвари муҳим дар Осиёи Марказӣ» номида, нақши онро дар таъмини амнияти минтақавӣ баланд арзёбӣ намуд. Ҷонибҳо мувофиқа карданд, ки муколамаи созандаро ҷиҳати рушду инкишофи минбаъдаи муносибатҳои дуҷонибаи гуногунсоҳа ва мутақобилан судманд идома диҳанд.