Мушовараи муштараки вазоратҳои корҳои дохилии ҶТ ва ФР

Душанбе, 5 октябр. (АМИТ «Ховар», Мавҷуда Анварӣ). — 9-10 октябри соли равон ҷаласаи навбатии мушовараи муштараки вазоратҳои корҳои дохилии Ҷумҳурии Тоҷикистон ва Федератсияи Русия дар шаҳри Душанбе баргузор хоҳад гашт. Ҳайати намояндагони Вазорати корҳои дохилии Федератсияи Русия бо роҳбарии вазири корҳои дохилии ин кишвар Колоколтсев Владимир Александрович ба Ҷумҳурии Тоҷикистон меояд.Ба ҳайат инчунин аъзои мушовараи муштарак- муовинони вазири корҳои дохилии Федератсияи Русия ва дигар шахсони расмӣ шомиланд.Дар ҷаласа масъалаҳои ҳамкориҳои муштараки вазоратҳои корҳои дохилии ҶТ ва ФР дар мубориза бар зидди ҷинояткорӣ, аз ҷумла бар зидди экстремизм ва пешгирии фаъолияти гурӯҳҳои ҷинояткори муташаккил ва иттиҳодияҳое, ки робитаҳои трансмиллӣ доранд, мавриди муҳокима қарор дода мешаванд. Инчунин дар ҷаласа лоиҳаи Нақшаи кории мушовараи муштараки вазоратҳои корҳои дохилии ҶТ ва ФР барои соли 2013 баррасӣ мегардад.