Нахи пахта зиёд мешавад

Душанбе, 23 октябр. (АМИТ «Ховар», Кристина Эрлих). – Корхонаҳои ресандагии кишвар тайи 9 моҳи соли ҷорӣ дар асоси дурнамои чорабиниҳои барномаи «Коркарди нахи пахта дар ҶТ барои давраи то соли 2015» 7 ҳазору 512 тонна нахи пахтаро коркард намуданд, ки назар ба ҳамин давраи соли гузашта баробари 1 ҳазору 689 тонна зиёд аст. Суръати афзоиш 129 фоизро ташкил дод. Дар ин бора аз котиботи Вазорати энергетика ва саноати ҶТ ба мухбири АМИТ «Ховар» хабар доданд.Мувофиқи суханони манбаъ, дар ҳамин давра 6 ҳазору 385 тонна калоба тавлид шуд, ки нисбат ба ҳамин давраи соли гузашта баробари 1 ҳазору 434 тонна зиёд аст. Дар корхонаи «Хима – Текстил» — и ноҳияи Ёвон бунёди силсилаи дуюм ва сеюми хати махсуси нассоҷӣ барои истеҳсолу рангрезии калоба идома дорад. Ғайр аз ин дар фабрикаи «Нику – Хуҷанд» бо истифода аз хатҳои нави технологӣ соле 2 ҳазору 500 тонна нахи пахта коркард шуда, дар фабрикаи ҷӯробу пайпоқи «Наврӯз» — и ноҳияи Зафаробод ҳар сол то 4 миллион ҷуфт ҷӯроб тавлид мегардад.