Нахустин намоишгоҳ-фурӯши хайриявӣ

Душанбе, 16 октябр. (АМИТ «Ховар», Зарангез Латифова).-Рӯзи 20-уми октябри соли ҷорӣ дар гулгашти паҳлӯи Театри опера ва балети ба номи Садриддин Айнӣ нахустин намоишгоҳ- фурӯши хайриявӣ баргузор мегардад. Ташаббускорони намоиш радиои «Ватан» бо ҳамдастии ташкилоти ҷамъиятии «Даст ба даст» ва сомонаи Tajikmama мебошанд. Ҳадаф аз баргузории намоишгоҳ тақдими туҳфаҳои идона ва солинавӣ ба кӯдакони ятиму бепарастор аст, иброз намуд директори барномаҳои радиои «Ватан» Субҳон Ҷалилов. Номбурда ҳамчунин гуфт : «Дӯстони радиои мо ва ҳар нафари машҳуру шинохта чизе аз молу ашёи сифату арзиши хубдоштаро, ки дигар истифода намебаранд, ба мо пешниҳод мекунанд. Мо онҳоро дар рӯзи намоиш ба фурӯш бароварда, барои ҳамаи онҳо нархи рамзии аз 3 то 50 сомониро мегузорем. Бар замми ин бо молу ашёи нафарони шинохта ва машҳур (мо умедворем, ҳатман пешниҳод мешавад) музояда баргузор мешавад». Ӯ иброз намуд, ки маблағи аз фурӯш ба даст омада барои туҳфаҳои идона ба кӯдакони ятиму бепарастор сарф мегардад. Бояд ёдовар шуд, ки дар ҷараёни намоишгоҳи мазкур барои кӯдакон бозиҳои саргармкунанда бо иштироки масхарабозону қаҳрамонони дигари афсонавӣ пешкаш мешавад.