Нашри маҷмӯа дар бораи таърихи навтарини сиёсии кишвар

Душанбе, 2 октябр. (АМИТ «Ховар», Дилшодаи Хайруллоҳ).-Дар нашриёти «Эр-граф»-и пойтахти ҷумҳурӣ китоби нави таҳлилии нависандаи шинохтаи тоҷик  Воҳид Ғаффорӣ ва мушовири калони Сарвари давлат оид ба сиёсати хориҷӣ Зафар Сайидзода таҳти унвони «Эмомалӣ Раҳмон дар оинаи замон» http://andesha.tj/sites/default/files/book_4.zip бо забони тоҷикӣ аз чоп баромад. Он осори дар тӯли солҳои гузашта дар ҳамкорӣ таҳиягардидаи муаллифонро роҷеъ ба фаъолияти сиёсии Президенти Ҷумҳурии Тоҷикистон Эмомалӣ Раҳмон дар бар мегирад. Чор қисми таркибии китоб «Эмомалӣ Раҳмон: Ман ба шумо сулҳ меоварам», «Президент Эмомалӣ Раҳмон ва густариши худшиносии миллӣ», «Эмомалӣ Раҳмон-бунёдгузори Артиши миллии Тоҷикистон» ва «Пешбару раҳнамои миллат» номгузорӣ шудаанд.   Ин маҷмӯа, ки аз 372 саҳифа иборат аст, ба хонанда имкон медиҳад, дирӯзу имрӯзи Тоҷикистони соҳибистиқлолро бо ҳам муқоиса кунад ва роҳи тайкардаи кишварро пас аз Иҷлосияи таърихии 16-уми Шӯрои Олии Ҷумҳурии Тоҷикистон — дар тӯли бист соли дигаргуниҳои созандаи куллӣ- чун дар оина мушоҳида намояд. Дар аснои иншои асар муаллифон далелу арқоми ҷолиб ва санадҳои сершумори давлатиро ба гирдоби пажуҳиши илмию сиёсӣ кашидаанд.