Нашри нахустини рӯзномаи “Тоҷиксодиротбонк”

Душанбе, 31 октябр. (АМИТ «Ховар», Ибодат Давлатова).-Шумораи нахустини рӯзномаи “Тоҷиксодиротбонк” аз чоп баромад. Тавре ки ба мухбири АМИТ «Ховар» аз «Тоҷиксодиротбонк» хабар доданд, нашрия дар Вазорати фарҳанги Ҷумҳурии Тоҷикистон ба қайд гирифта шуда, фаъолияти ҶСК “Тоҷиксодиротбонк”-ро дар саҳифаҳои худ инъикос менамояд. Баланд бардоштани маърифати бонкии кормандону мизоҷони бонк, иттилоот ва тарғиби таҷрибаи пешқадам дар соҳаи бонкдорӣ, шарҳи рӯйдодҳои соҳа, дастурҳои корбарӣ ва масоили марбут ба ҳаёти бонкӣ ҳадафҳое мебошанд, ки аҳли қалами рӯзнома дар назар доранд, қайд намуд манбаъ. “Маърифатпарварӣ – омили муҳиму тақдирсози ҳаёти ҷомеа”, “Ифтитоҳи филиалҳои нави “Тоҷиксодиротбонк”, “Кортҳои пардохтӣ – дарҳои нав дар олами имконот ва имтиёзоти ҳайратангез”, “Бозии навбатии амонатҳои бурдноки “Иқбол” аз ҷумлаи матолибеанд, ки дар шумораи аввали рӯзнома ба нашр расидаанд.