Нерӯгоҳҳои хурди барқи обии Тоҷикистон

Душанбе, 23 октябр. (АМИТ «Ховар», Лаззат Диловарзод).- То 1-уми октябри соли ҷорӣ дар ҷумҳурӣ 179 адад нерӯгоҳи хурди барқи обӣ ба қайд гирифта шудааст,- иброз доштанд дар Вазорати энергетика ва саноат ба хабарнигорон.Ба иттилои манбаъ, аз шумораи умумии нерӯгоҳҳо ҳамагӣ 106-тои он коршоям буда, беш аз 8 млн.800 ҳазор кВт/соат нерӯи барқ истеҳсол менамояд, 73 нерӯгоҳ бо иқтидори умумии 4 млн. 921 кВт/соат дар ҳолати корношоям қарор дорад.Дар Агентии омори назди Президенти ҶТ ин рақамҳоро тасдиқ намуда, иброз доштанд, ки айни замон дар ВМКБ аз 20 нерӯгоҳи хурди барқи обӣ 15-тои он бо иқтидори 2 млн. 743 ҳазор кВт/соат, дар вилояти Суғд аз 57 нерӯгоҳи хурди барқи обӣ 54-тои он бо иқтидори 3 млн. 715 ҳазор кВт/соат, дар Хатлон аз 13 нерӯгоҳ ҳамагӣ 5-тои он бо иқтидори 142 ҳазор кВт/соат ва дар ноҳияҳои тобеи ҷумҳурӣ аз 89 нерӯгоҳи хурди барқи обӣ 32-тои он бо иқтидори 2 млн. 213 ҳазор кВт соат фаъолият дорад. Дар сурати пурра барқарор кардани 73 нерӯгоҳи аз кормонда аҳолӣ ба таври илова бо зиёда аз 4 млн. 921 кВт/соат нерӯи барқи таъмин мегардад.