Оғози даври дуюми эмгузаронӣ

Душанбе, 30 октябр. (АМИТ «Ховар» Ибодат Давлатова).-29 октябри соли ҷорӣ дар мамлакат даври дуюми “Рӯзҳои миллии эмгузаронӣ ба муқобили бемории гулӯзиндонак» оғоз гардид. Тавре ки ба мухбири АМИТ «Ховар» аз маркази матбуотии Вазорати тандурустии Ҷумҳурии Тоҷикистон хабар доданд, даври дуюм дар байни аҳолии аз 13 то 21- сола бо ваксинаи АДС-М гузаронида мешавад. Бо ибтикори Ҳукумати Ҷумҳурии Тоҷикистон ва Вазорати тандурустӣ бо мақсади пешгирии бемории гулӯзиндонак, баланд бардоштани сатҳи масъунияти аҳолӣ нисбат ба бемории гулӯзиндонак «Рӯзҳои миллии эмкунӣ бар зидди бемории гулӯзиндонак» аз 24 то 29 сентябр даври якум дар байни аҳолии аз 7 то 21- сола бо ваксинаи АДС-М гузаронида шуд. Даври дуюм аз 29 октябр то 3 ноябри соли ҷорӣ гузаронида мешавад. Ба давраҳои дуюм ва сеюми маъракаи эмгузаронӣ зиёда аз дуюним миллион кӯдакону ҷавонон фаро гирифта мешаванд.