«Пешгирӣ ва оқибатҳои тиббии нашъамандӣ»

Душанбе, 22 октябр. (АМИТ «Ховар», Мавҷуда Анварӣ).- Кормандони Агентии назорати маводи нашъаовари назди Президенти кишвар бо донишҷӯёни Омӯзишгоҳи тиббии шаҳри Хоруғ дар мавзӯи «Пешгирӣ ва оқибатҳои тиббии нашъамандӣ» мулоқот доир намуданд.Алишер Ташрипов, сардори Шӯъбаи назорати маводи мухаддир ва пешгирии нашъамандии Агентӣ ба АМИТ «Ховар» хабар дод, ки мулоқот ба таври интерактивӣ гузаронида шуда, ба донишҷӯён маълумот оид ба ҳолати вазъи нашъамандӣ дар кишвар, махсусан дар ВМКБ, бемории нашъамандӣ ва аломатҳои зоҳирии он, инчунин расонидани ёрии аввалини тиббӣ ҳангоми сӯистеъмоли маводи нашъаовар ироа шуд. Ҳамзамон дар бораи намудҳои маводи нашъадор, таъсири мухаддирот ба бадани инсон сухан ронда, ба саволҳои ширкаткунандагон посух дода шуд. Кормандони Агентӣ аз донишҷӯён даъват карданд, ки чун табибони оянда дар пешгирии нашъамандӣ ва таблиғоти зиддинашъамандӣ фаъолу саҳмгузор бошанд.Мулоқоти кормандони Агентӣ бо сокинони шаҳру ноҳияҳои ВМКБ идома дорад.