Пиршавӣ дар асри XXI, пирӯзӣ ва даъват

Душанбе, 12 октябр. (АМИТ «Ховар» Ибодат Давлатова)- «Пиршавӣ дар асри XXI, пирӯзӣ ва даъват» таҳти ин унвон маърӯзаи худро Хазинаи нуфузи Созмони Милали Муттаҳид (ЮНФПА) якҷоя бо ташкилоти «Ҳэлп Эйҷ Интернэшнл» пешкаш намуда, имрӯз дар шаҳри Душанбе мизи мудаввар баргузор кард.  Дар чорабинӣ намояндагони вазорату идораҳо, донорҳо, намояндагони ташкилотҳои ғайриҳукуматии байналмилалӣ ва маҳаллӣ иштирок доштанд. СММ бо ташкилоти «Ҳэлп Эйҷ Интернэшнл» маърӯзаи худро пешкаши иштирокчиён намуд, ки дар он вазъи имрӯзаи ҳаёти пиронсолон ҳаматарафа таҳлил шуда, барномаю тадбирҳое, ки ҳукуматҳо ва тарафҳои дигари манфиатдор баъди Ассамблеяи дуюми умумиҷаҳонӣ дар бораи проблемаҳои пиршавӣ бо мақсади татбиқи «Нақшаи амалиёти байналмилалии Мадрид оид ба проблемаҳои пиршавии аҳолии ҷаҳон ва вокуниш нишон додан ба имкониятҳои ҳалли онҳо» андешидаанд, шарҳу тавзеҳ дода мешавад. Инчунин иштирокчиён зикр намуданд, ки фақат дар давоми 10 сол миқдори одамони солхӯрда дар тамоми ҷаҳон зиёда аз як миллиард нафарро ташкил хоҳад кард. Бояд гуфт, ки маърӯза натиҷаи ҳамкории зиёда аз бист шӯъбаи СММ ва ташкилотҳои калони байналмилалие ба шумор меравад, ки ба ҳалли масъалаҳои пиршавии аҳолӣ машғуланд.